काठमाडौँ । सरकारले देशभित्र पैठारी वा उत्पादन हुने विद्युतबाट सञ्चालित एम्बुलेन्स र शव वाहनमा लाग्ने मूल्य अभिवृद्धि कर (VAT) र स्वच्छ पूर्वाधार लगानी शुल्क पूर्ण रूपमा छुट दिने वातावरणीय एवं स्वास्थ्यमैत्री निर्णय गरेको छ । मङ्गलबार बसेको मन्त्रिपरिषद् बैठकले गरेका ५ महत्त्वपूर्ण निर्णयहरू सार्वजनिक गर्दै सरकारका प्रवक्ता एवं शिक्षामन्त्री सस्मित पोखरेलले यो व्यवस्थाबाट स्वास्थ्य सेवा र पर्यावरणमा सकारात्मक प्रभाव पर्ने विश्वास व्यक्त गर्नुभयो । यसका साथै सरकारले लामो समयदेखि प्रतिक्षित पूर्व महालेखापरीक्षक टङ्कमणि शर्मा ढङ्गालको संयोजकत्वमा गठित एनसेलको सेयर खरिद–बिक्री सम्बन्धी अध्ययन तथा छानबिन प्रतिवेदन २०८० लाई समेत सार्वजनिक गर्ने निर्णय गरेको छ ।
बैठकले गृह मन्त्रालयको प्रस्तावमा सुनसरी र सिराहा जिल्लामा हालै भएका प्रदर्शनका क्रममा ज्यान गुमाएका चार जना नागरिकलाई सहिद घोषणा गर्ने निर्णय समेत गरेको छ । सहिद घोषित हुनेहरूमा सुनसरीका ओमप्रकाश मेहता, जयप्रकाश मेहता, रबिन्द्रकुमार मेहता र सिराहाका गणेशकुमार यादव रहेका छन् । सरकारको यो निर्णयले पीडित परिवारलाई राहत र न्यायको अनुभूति गराउने प्रवक्ता पोखरेलले बताउनुभयो ।
यसैगरी, मन्त्रिपरिषद्ले नेपाल र पोर्चुगलबीचको कूटनीतिक सम्बन्धलाई थप सहज बनाउन पोर्चुगल सरकारलाई काठमाडौँमा काउन्सिलर कार्यालय खोल्न अनुमति दिने निर्णय गरेको छ । बैठकले वैदेशिक रोजगार बोर्डको रिक्त कार्यकारी निर्देशक पदमा बाराका निर्मल कुमार उप्रेतीलाई नियुक्त गर्ने निर्णय गर्दै आजका मुख्य कार्यसूचीहरूलाई टुङ्ग्याएको छ ।
